Úrslit í Tippleik Chelsea.is vegna keppnistímabilsins 2023-2024 voru kunngjörð á félagsfundi í Chelsea-klúbbnum er haldinn var í Ölveri laugardaginn 1. júní sl.
Við sama tækifæri voru veittar viðurkenningar fyrir efstu þrjú sætin í Tippleiknum auk þess sem einn heppinn Tipplingur hlaut glaðning burtséð frá árangri (slembiúrtak).
Yfir tímabilið voru í heildina veittir alls 18 vinningar sem dreifðust á 10 getspaka Tipplinga en m.a. voru veitt verðlaun fyrir hæsta skor hvers mánaðar á keppnistímabilinu.
Á vorfundinum kom fram hugmynd um að efna til Tippleiks er næði til leikja Chelsea á undirbúningstímabili liðsins fyrir næsta keppnistímabil og munu umsjónarmenn Tippleiksins auk stjórnar Chelsea-klúbbsins taka ákvörðun þar um á næstu vikum og verður niðurstaða þar um kynnt er hún liggur fyrir.
Umsjónarmenn Tippleiksins færa þeim samstarfsaðilum er gáfu vinninga í leikinn bestu þakkir fyrir og óska jafnframt vinningshöfum öllum til hamingju með vinninga sína.
Þrjú efstu sætin í Tippleiknum skipuðu eftirtaldir:
- Jóhannes Elíasson 83 stig
- Steinar Harðarson 75 stig
- Þórhallur Sverrisson 64 stig
Slembiúrtaki = Árni Björn Ólafsson.
Tippkveðja,
Umsjónarmenn.